- أحمد تاج اسم لا غني عنه بالتعريف ولكن نود أن نعرف من هو أحمد تاج عن قرب ؟
- احمد تاج.... روائي و قاص... صدر ليا خبايا في 2015 و سيراف في 2017.... زوج و اب لطفلتين (بيري و هيدي).... بالنسبه لحياتي العمليه فمقدرش احدد نفسي بالظبط في مهنه لاني امتهنت و لازلت بمارس اعمال كتير.....
- عيشت حياتي كلها في طنطا و مقيم من سنه واحده بس في القاهرة
- هل لمكان النشأة تأثير علي شخصيتك ؟
- مش مكان النشأة بقدر ما هو طبيعة النشأة.... لأني اتربيت بين عالمين مختلفين... في مدينتي طنطا و هي مدينه صغيره نوعا و بين القاهرة عند عيلة والدتي.... و طبيعتين محافظه لمدينتي الاصلية و طبيعة اكثر تفتحا للقاهرة
- سافرت قبل كدا صحيح ؟ وروحت فين وايه كانت طبيعة السفر ؟
- المانيا في الاغلب للشغل... فرنسا للشغل و الفسح طبعا
تركيا... النمسا... التشيك... المجر... ايطاليا... اليونان... هولندا مدمن سفر
- ازاي قدرت تجمع بين سفرك واللغات التي تعلمتها وكتابتك ؟
- انا بحب اللغات بشكل منفصل تماما عن هواية السفر.... انا عاشق لفكرة اللغة و التعبير اللغوي... السفر هوايه جت بالصدفه لما سافرت اكتر من مره و اعتدتها بعد كده... و لقيت ان السفر خلاني اكتشف ازاي ان اهل كل لغه بيفكروا باسلوب لغتهم نفسه
- كتابتي استفدت فيها من سفري علشان اوسع ال سكوب بتاع الروايه... اقدر انقل حركه و فكر اوسع و اكثر تنوعا يخدم شغلي
- متي بدأت رحلتك في عالم الكتابة ؟
- انا بكتب من تالته اعدادي.... و ابتديت احتفظ باللي بكتبه و اهتم بيه و اسجله من اولى جامعه ، وبدأت النشر من 2015 فقط
- نقدر نقول موهبة ؟
- اكيد..... الناس اللي مبتعرفش تعبر بشكل جيد لفظيا بينجحوا في الكتابه....
- و في نوع تاني و هم الناس اللي عندهم فكره عايزين يوصلوها لعقول مش آذان
- أنا شوية من ده وشوية من ده
- من شجعك علي تنمية هذا الجزء من شخصيتك ؟
- أمي طبعا
- اول من مسكني كتاب
اول قارئة ... أول ناقده .... أول مشجعة
ووالدي عمره ما منعني اقرأ ومنعني من شرا كتاب ابدا
- هل تتذكر كم من الكتب قرأتها ؟ ، وكم من الوقت تحظى به قرأتك ؟
- عمري ما حولت اعد ما قرأت... او اتفاخر بكم او بمن... و شايف انه نوع من المراهقه الفكرية
- لكن أنا اللي أثر فيا شارلوت برونتي ، اوسكار وايلد ، د. عبد المعطي شعراوي ، يوربيديس وهوميروس
- أكتر ناس حسيت أنهم نحتوا أفكاري
- لونك المفضل في الكتابة ؟
- ماليش لون.... لان اللون الكتابي ماهو الا غلاف خارجي للفكره بالنسبالي.... يعني بيكون عندي رساله و بختار لون ادبي توصل بيه رسالتي بشكل افضل
-الرسايل النفسيه و السيكوباتيه في خبايا كان يليق بيها الاطار المجتمعي لابراز فكرة الفرد في مقابل الجميع
-و الفكره في سيراف القايمه على اكتشاف و اعادة اكتشاف الذات... ناسبها الاطار الفنتازي
-و كتابي القادم عن الرجل و المرأه... و علشان كده هيكون رومانسي بشكل او آخر
-لكنه مش رومانسي صريح
- ما هي رسالتك ككاتب ؟
- اني اشجعك كقاريء علة الاكتشاف و التقرير و تحديد المسار....
نجاحي مش ان القارئ ينبسط بس... نجاحي انه يفكر... يسأل ليه و ازاي... و يلاقي اجابته من دماغه مش من النمط الثقافي المفروض عليه
- دي رسالتي ككاتب عموما
- انك تفكر و تعيد النظر في الثوابت قبل المتغيرات
- أيهما أقرب إلي قلبك سيراف أم خبايا ؟ ولماذا ؟
- هجاوبك الاجابه الديبلوماسيه كلهم اولادي
- خبايا خدت مني راقات.... تعبتني جدا و اتكتبت 4 مرات و قريت عليها كمية كتب في علم الاجتماع
-سيراف 5 سنين تنفيذ و الجزء اللغوي استنفذ مني لوحده زياده عن 16 سنه.... و قريت علشان انفذها مجلدات الحضارات و الميثولوجي الاغريقي و الشركسي و السلافي
- ف حرام ابخس قيمه حاجه منهم في قلبي
- بعيدا عن الفشل والنجاح بس انا اشتغلت الاتنين بضمير وراضي عنهم تماما
- هل أثرت اعمالك علي بيتك وبناتك أم لا ؟
- بناتي لسه 9 و 8 سنين.... علاقتهم بكتبي هي انهم مستنيين يقروها و انا بقولهم يستنوا شويه.... مراتي قارئه في الاساس... و اكيد ليها دور في التفكير معايا
لكن أثر .. لأ
- في وجهة نظرك العالم العربي أزمة قيادية أم أزمة فكر ؟
- ازمة فكر..... الناس في الشرق الاوسط معجبين جدا بالنمطيه.... كل واحد بينقي نمط و يمشي عليه
- محدش عايز يوجد فكره الشخصي.... كل واحد عايز يمشي على نمط فكر آخر سائد
- ما هي الرسالة التي تود توصيلها للشباب ؟
- فكروا.... متستسهلوش
- من من الكتاب الحاليين ترى فيه شيئا مستقبلا ؟
- انا لسه كاتبلي كتابين... مين انا علشان اقول و اتنبأ.... بس محمود علام قلمه هايل...... اكتر حد ارتحت و انا بقرا شغله... و حسيت انه سلس بدون فذلكه او تسطيح او تقعر
- ما هي توجيهاتك لمن هم علي اعتاب الكتابة ؟
- ارجوكم ابعدوا عن الرعب
ابوس اديكم ابعدوا عن الويكيبيديا و الكتب الرخيصه لتوثيق علم من خلالها
الموضوع ده زاد عن حده
- شايف فن الرواية رايح لفين ؟
- رايح في نفس اتجاه السينما.... تجاري بلا قيمه يتهافت عليه الناس.... فكري متقعر لا يتقبله الناس
- احنا مش عارفين نوزن المتعه بالفكره
- فقدنا هذه القدره من زمن
- و ان كان البعض يصارع لاعادة التمكن منها
- ما هو السؤال الذي انتظرته مني ولم أسأله لك ؟
- شايف نفسك فين بعد 5 سنين
- الإجابة ؟
- ههه... انا من عشر سنين كنت صاحب مصنع حلويات
من 9 كنت مذيع راديو و مترجم
من 7 كنت مدرس انجليزي
من 3 كنت مدير محل حلواني و مترجم و ممثل دوبلاج
النهارده انا مدير تصدير و روائي
الحياه مغامره متعرفش هتوديك فين
- و انا متشوق اعرف الاجابه و اتفاجئ زي ما بتفاجئ من 10 سنين لدلوقت
-- خايف بعد خمس سنين تبقي رئيس الجمهورية هههه
- ليه لا
- اللي عزته عملته.... مش شرط اكون الانجح... بس بوصله
- " قالوا عنك "
- متعجرف و مغرور.... ابن ناس زياده عن اللزوم ، مصطنع... بلاستك
- طيب خلينا نشوف قالوا ايه
- شخصية محترمة ، خلوق ، ذو ثقافة عالية ، معرفته شرف عظيم لأي حد ، مطلع علي كثير من الثقافات ولغات كثيرة ، سيصبح ذو شأن كبير مستقبلا إن شاء الله
" إسلام عبد الله "
- اسلام عبدالله من الناس المحترمة جدا ، ومن أقرب الناس في المجال الأدبي ليا ، وحد خلوق قوي وبيدي احساس للناس أنه أخوهم قبل ما يكون صاحبهم وأنا بحبه وشهادتي فيه مجروحه وأعتقد ان شهادته فيا مجروحه بردو ههههه لأنه هو إنسان حبوب وأنا بحبه جدا وهو كمان بيحبني جدا ، من أحسن الناس خيالا لأنه دايما بيحط نوت كدا اللي هو توقع ألا تتوقع ، ولما بتدخل في روايته بتضطر تنصاع لأفكاره هو لأن خياله مبهر وغير تقليدي وغير مكرر
- تاج عبقري مؤلف واعد ، سيراف من إجمل ما كتبت قدرتك علي خلق عالم آخر بلغة من خيالك في وجهة النظر
من يستطيع فعل ذلك فهو كاتب عبقري ، ذو خلق
حلمت برواية سيراف وبتاج شخصيا وغالبا لبسني في الحلم لأنه كان بيتحول هههه
" إسلام وهيب "
- مع الأسف لقاءاتي مع الاستاذ إسلام وهيب عابرة ، لكن أنا متابعه ومتابع بوستاته اللي بيتكلم الناس بيها ، فهو حد دماغه كبيرة جدا حد بيقدر يوصل الأفكار الجامدة بشكل سلس وكوميدي ههههه ، مش زي باقي الناس خالي من التعقيد ، حد محترم وأنا سعيد باني علي قايمة أصدقائه في الفيس بوك وأتمني علاقتنا تتطور
- تاج ككاتب سيراف أعجبت به شخصيا بعد قرأته لغاليزا وفكرتها وكتابته في موقع العلمانية مقال تفسيري لها ، وقد تطورت هذه العلاقة في معرض الاسكندرية عندما ترك لي رواية سيراف بإمضاءه موصيا أصحاب الدار بحفظها لي واهتم برأيي وزاد انبهاري له وبعقليته بعد قراءة سيراف
" أحمد الزيني "
-زيني طبعا دا صديق عزيز عليا من الكتاب الناجحين جدا ، لأنه عارف هو عايز أيه وعارف ازاي يقدر يوصله قدر في فترة صغيرة أنه يبني لنفسه قاعدة من القرأ والمتابعين لأنه قدر يخاطب قراءه بلغته ، كاتب ناجح وإنسان علي المستوى الشخصي إنسان محترم جدا
- سيراف عالم من خيال الكاتب حيث صنع الرائع أحمد تاج حضارة عريقة بلغة خاصة به ودين يرقي للكمال ، لغة قوية ، احداث متسلسلة في الحبكة الروائية وسرد يجذب خيال القارئ
ريفيو أحد القراء " حسام محمد "
- حسام مش مجرد قارئ حسام تقدر تقول صديق شخصي بعتز بيه رغم أني آكبر سنا من كل اللي ذكرتهم بشوية مراحل ههههههه
حسام تقدر تقول عليه قارئ محترف مخضرم بيعرف هو بيقرأ أيه وبيعرف يقاوم خيال الكاتب لحد ما الكاتب يجبره علي تصديق هذا الخيال ، إنسان محترم جدا ما الله شاء الله عليه شاب كويس قوي
-بشكر حضرتك جدا علي الحوار الجميل دا وسعيد جدا جدا
انا كنت لما بلاقي تعليق ليك عندي كنت بخاف اني اكون غلطان في حاجة وفي نفس الوقت فرحان اني هلاقي نقد ودا مش احساسي لوحدي دا طلع احساس ناس كتير
- هههه انا المرعب
- انا سعدت باسئلتك و ربنا يوفقك يا رب
" تاج من الناس اللي علمها وثقافتها ساعات بيحسسني أنا نفسي بالتضاؤل.. شخص مثقف فعلاً بلا تصنع، وشديد الرقي، وأظن أنه من نوع الأدباء الذين يحتاجهم الوسط الأدبي ليرتقي فعلاً
" محمود علام "
ليست هناك تعليقات:
إرسال تعليق